It's my life

Hun lo in her danglam leh khawvel lo changkang zelah hian thalai te hi kan ngaihtuahna leh kan rilru a thil awm te, kan vei zawng leh tha kan tih zawng te pawh tunhma kan nu leh pa te thatlai huna an ngaihtuahna ai kha chuan a danglam fe tawh zawk awm e.
Khawvel changkang zelah hian Thalai te pawh kan rawngbawlna leh kan activities hrang hrangah hma kan sawn nasa em em a, chutih rual chuan insiamthatna tur leh hma sawnna tur tam tak kan nei a ni. Tunlai khawvelah chuan thalaite rilru lapeng thei thil tamtak Internet hmangin kan tawng chho ve ta pawp pawp mai. Youtube,Orkut, Facebook, Google, Twitter, etc. heng te hi tunhma te kha chuan film ah leh hnam changkang ho tih kan hmuh thin kha a ni mai a, tunah chuan thalai ten kan tuipui ber pakhat a ni ta reng mai. Mobile phone hmangin duhtawkin Internet kan online char char thei tawh a, khawvel hmun hrang hrang a mi ten nen kan duhtawkin hmel inhmu theiin kan inkawm thei tawh a, hetiang changkanna kan banphak a a awm ve ta reng mai hi a lawm awm hle.
Amaherawhchu, hetiang changkanna thil tam takin thalai leh tleirawl zawk te rilru a thil min tuh sak hi kan ngaihtuah ngai em? Kan hriat miah loh hian kan thinlungah kawng hrang hrangin nghawng a nei thei a, chung zinga pawi thei ber leh kan nun min ti chhe thei tu, tleirawl leh thangthar lo la awm zel tur te nun min hruai khawlo thei tu pakhat chu ‘mahni in dah lenna, mahni tha intih tawkna’, ‘It’s my life’ tih rilru put hi a ni. ‘hei hi ka nun a ni a, tuman thu an nei lo, ka duh dan dan in ka nung anga, tumah ka nunah an inrawlh tur a ni lo’, tih ngaihdan hi kan thinlungah a piang tlat a ni. TV serial mizo tawnga an lehlin tam zawkah hian hetiang lam rilru min put tir theitu hi a tam khawp mai. Tehkhin nan. Tuten emaw thil kan tih thin leh kan chindan thin ho teah min han khak zeuh sela kan chhungril a khei deuh zak mai thin a ni. Naupang tereuhte pawh an thawmhnaw chungchangah pawh an mahni hak duhzawng te lo chu an bel luih theih tawh der loh. Tleirawl zawk te pawh Incheina chungchangah han sawisel ila, “a thu a awm lo emai, ka duh dan dan in ka inchei ang”, tih hi an ngaihdan a ni tawp tawh a, a sawisel tu pawh an ngeiin a haw hlur thin a ni.
Hetiang karah hian thalai te hian engtinnge hma kan sawn ang a, kan nau te leh thangthar lo la awm zel tur ah hian kan in enkawl ang tih hi ngaihtuahna ah hmang ila a duhawm hle mai. ‘It’s my life’ tih rilru hi pu tho chungin “Hei hi ka nun a ni a, Lalpa duhdan a nung turin ke ka pen ang. ka rawngbawlna dal theitu an awm tur a ni lo”. tiin rilru pu ila, Khawvel mi te ‘It’s my life’ leh ringtute ‘It’s my life’ hi kan dan hran a tha khawp mai. Kan chungah Pathianin ro a la rel dawn a ni tih hre reng chungin kan thinlunga ‘It’s my life’ tih hi i chhut ngun theuh ang u.

Bultanna

K.T.P Member ten kan rawngbawlna kawnga hma kan sawn na atan leh tun aia kan in pawh tlan a, hmun danga awm te nen chanchin kan in hriat tawn zung zung theih nan a tangkai tak ah hmang theuh ila a duhawm hle...